32^ - Puntata: FAVOLE - Parte seconda - AL DÒ FIOLI

Scritto da webmaster

Categoria: Storia

Pubblicato: 04 Dicembre 2020

  Osta cmè ch'la pianzoiva, l'an savòiva ch'sèl faè, mo a forza 'd ziré la tèsta in tot i canteun, la s'na det che un po' piò in là u j era matèra una stresa 'd leusa, la s'j avsinet e la s'truvet davaènti mu 'na porta.

 L'an stet taènt a lè a pansaèi, la buset pien, pien sa di gran stremal madòs, e la porta la s'arvet da par lì, u s' antraèva 't un curidori longh tot pin 'd leusa cmè s'ui fos e' sòul, la s 'infilet e la andet a finoi int un cambaròun tot pin 'd gatin.

  Mo quant ch'ui n'era, e tot i curoiva da lì, che, cuntenta cmè una pasqua, l'ai feva al carèzi, l'ai zcuròiva, l'ai pitnaèva, l'ai basaèva, l'ai deva da magné e piò taèrd, cmè se fos di burdlin, l'ai cantet 'na nina-nana fena a ch'è, dòp un po' 'd mieul, cuntint s' indurmantet, pu straca s-centa par tot al novi dla zurnaèda, la s' stuglet se' sulaèr e la ciapet sòn ènca lì.

  La s'viget ch'l'era matòina, 't un lèt 'd los e 't una cambra che acsè bèla l'an n'avòiva mai vest in tota la su voita: tendi, voidar, lampaderi, tavulòin pin 'd ròbi boni da magné e bòi, gnenca che fos 'na principèsa.

  L'an, savòiva ch'sèl pansaè, la s'mitet disdòi se' lèt s'j occ spalanché, ch'l'antret 't la cambra du gateun dret sal zaèmpi di drì, j era e' ba e la ma 'd tot chi gatin: “Avem vest e' ben che t'é vleu mi nost fiul, e vo doi che t ci una braèva e bona ragaza, vin sa mè”, e get e' mas-ci, “ch'a t'insegn la straèda par turnaè ma caèsa tu!”.

  U la purtet pròima 't una cambra pina 'd stoi:

  “Capa quèl ch'ut pis 'd piò!”. E get e' gatòun.

  “Mo mè a sò purèta, ò da lavuraè in campagna, um va ben che zinalòun arpzaè!”.

  “Na”, e get e' gatòun,“tè ta t ci da met e' piò bèl ch'u j è!”.

 J antret 't un'aènta cambra pina 'd scaèrpi.

  “Capa al scaèrpi ch'a t pis 'd piò!”. Ancòura leu.

  “Mo mu mè am bsògna par lavuraè, e va ben ènca chi scarpeun cunsumé!”.

  “Na, tè ta t ci met al piò bèli ch'u j è!”.

 J andet pu 't una cambra pina 'd culaèni e anel, insòma tot i giuiel  piò bel ch'us putòiva pansaè.

  “Capa la culaèna e l'anèl che piò it pis 'd ògni raza!”. Sempra e' gatòun.

  “Mo mè a n'ò temp da purtèi, ò da lavuraè, par mè e va ben 'na spilina pr'i cavel!”.

  “Na, tè t'é da to i piò bel ch'u j è!”.

 E ui mitet me' còl una culaèna cmè che mai u s'era vest e un anèl me' doid che feva di sprai 'd tot i culeur.

 E par finoi j andet 't una stala pina 'd caval.

  “E adès capa e' caval piò bèl ch'u j è!”.

  “Mo par mè e va ben ènca che brichin che lè!”.

  “Na, tè mòunta sòura ste cavalòun biench, leu e sa la straèda par rivé ma caèsa tu, a

    mità t santiré cantaè e' gal, alòura tè vulta la tèsta d'indrì e adès at saleut e bona

   furteuna!”.

 E' caval e partet svelt cmè e' vent, arvat a mità de' bosch, us santet un gal a cantaè, e cmè ch'u j avnet inamòint al paroli de' gatòun, la s' ziret d'indrì e ...zac, ui spuntet 'na stèla d'or int e' mèz dla fròunta.

 A v'un degh al maraveji quant ch'l'arvet a caèsa, e' su ba u n'avòiva paroli, acsè cunzeda l'era la piò bèla ragaza ch'us fos mai vest int chi paraz, piò bèla ènca dla leuna e de' sòul e tot i steva a bòca verta par staèla a santoi intaènt ch'la racuntaèva i fat ch'u j era capitaè.

 La ma e la su fiola brota invezi as magneva e' fegat da la tegna, u n'era giost sgònd a lòu:

 “Admaèn t vé zò ènca tè 't e' pòz e ta t vniré a caèsa piò bèla ch'n'è lì!”.

 L'ai sufiet 't un'urècia ma la fiola bruta la su ma.

   (Continua)

      LE  DUE  FIGLIE - (Seconda  puntata)

 Come piangeva, non sapeva cosa fare, ma a forza di girare la testa in tutte le direzioni, si avvide che un po' più in là c'era per terra una striscia di luce, le si avvinò e si trovò di fronte ad una porta.

  Non rimase a pensare a lungo, bussò piano, piano con forti brividi addosso, e la porta si aprì da sola, si entrava in un corridoio lungo tutto illuminato come se ci fosse il sole, lo percorse e andò a finire in un salone tutto colmo di gattini.

Tweet

Whatsapp